Unse Platt



Op de Siet vörher heff ik över mien Platt schreven. Dor steiht schon immer „wi“ un „uns“. Deshalb mutt dat „Unse Platt“ heten.


Ik heff bi dree Fruunslüüd un twee Mannslüüd ut unse Gegend dat Plattdüütsch funnen, dat „mien“ oder beter seggt „unse“ is.


För rund twintig Johr het min Tante ünner de Nomen „Elsabe A. Fries“ een kleene Book rutbröcht mit de Titel „Geele Georginen“1. Ik weet nich, ob man dat noch kriegen kann. Se schrifft, dat mien Unkel bannig dor achterher weer „dat ik blot dat „wohre“ Platt to Papier bröche.“ Dat „wohre“ Platt weer för em unse Platt. Un dat heff ik dor uk funnen.


Denn heff ik in't Internet söcht un bin bi Artikel vun Ilse Pollmann landet. Dor weer ik „platt“. Se hett in een Gemeendeblatt opschreven, wie dat in ehr Kindheit op een kleene Buernsteed in unse Gegend togung. Wenn se to'n Bispeel över dat Pingstreinmaken und de Heutied schrifft, denn denk ik: jo, so weer dat un so hem wi schnackt. Wat dor steiht, dat is unse Platt (in de Internettext sind leider een Reeg Fehler vun't scannen in):

http://gezeiten.shz.de/Artikel/Op_Platt/651_Pingstreinmaken

http://gezeiten.shz.de/Artikel/Op_Platt/652_Heutied


To Wiehnachten hett mien Schwester mi twee Böker vun Annemarie Jensen schenkt. „Plattdüütsch leevt“2 un „Dit un dat besnackt op Platt“3. Wenn ik in Schleswig-Holsteen levt un Zeitung lest harr, denn harr ik ehr wiss kennt. Bi ehr kann ik ornlich wat leern, wat dat Nadenken över un dat Schrieven op Plattdüütsch angeiht. Se hett sik veel Gedanken över unse Spraak makt, dor nehm ik de Hoot af för. Bit ik sowiet bin, bruuk ik mindstens tein Johr.


All lang heff ik in mien Bökerschapp dree Bände vun Johannes Christiansen ut Harrislee. He is 1908 boorn un sien Platt is unse Platt:

„Lüd vun de Flensburger Kant...“ , „Kleene Lüd vun de Woterkant... un „So is dat Lewen...“4


Un denn heff ik noch een kleene Band mit plattdüütsche Gedichte vun Boy Lornsen5: „Sinfunikunzert“. Dat is Schleswig-Holsteener Platt vun't feinste, denk ik. So fangt sien Niejohrsgedicht an:


Dat oole Johr,

de groote Sack,

is vull bit bobenhen

mit dien Doon

un mit dien Snack,

dien avers un dien wenn.





1Geele Georginen, 1993, Mohland-Verlag / ISBN 3-928054-22-8

2Plattdüütsch leevt, 2012, Husum / ISBN 978-3-89876-597-8

3Dit un dat besnackt op platt, 2013, Husum / ISBN978-3-89876-664-7

4So is dat Lewen,1980, Flensburg / ISBN 3 88060 021 X

5Sinfunikunzert, 2007, Quickborn-Verlag / ISBN 978-3-87651-329-4