Carl Friedrich Wilhelm Borgward


* 10.11.1890 28.07.1963


Carl Friedrich Wilhelm Borgward weer een Autobuer in Bremen. He is dree Johr jünger as Wilhelm Kaisen wesen un jüst as Wilhelm Kaisen stammt he ut Hamburg un hett een Handwark lehrt.


Carl F.W. Borgward is as een Sön vun een Köhlenhöker in Hamburg-Altona boren wurrn. He hett Schlosser lehrt un is denn Ingenieur wurrn. 1912 keem he na Bremen. Dat dure nich lang, dor weer he al Kompagnon in een Firma, un 1921 harr he sien eegen Bedrief. Dor hett he noch keen Autos buut, man he leverte de Lloyd-Werke to.

1924 hett he sien eerste Dreerad-Wagen op de Markt bröcht, de Goliath. Um 1930 rüm köffte he de Hansa-Werke dorto. 1937 weer he alleen de Baas vun all sien Firmen, de Lastwagen un Autos buuten.

He leet sik mit de Nazis in un hett för de Wehrmacht produzeert. 1945 weer allens in Dutt. Man he hett dat schafft, dat he na de Krieg 1949 wieter maken kunn un dat Wark wedder in de Gang keem. De Autos Lloyd (Leukoplastbomber nömt), de Hansa Arabella un denn later de Isabella verköfften sik goot. 1955 hett he mehr Autos utlevert as Daimler. 1959 hebben 22 000 Lüüd bi em arbeidet.

Man he weer mehr Ingenieur as Koopmann un een Stuurkopp. He wull alleen regeern un hett dat aflehnt ut sien Fabiken een Aktien-Sellschapp to maken. Um 1960 rüm kreeg he Probleme mit dat Geld un de Banken. De Kosten weern to hoch, de Konkurrenz wurr grötter un jümmer mehr Autos bleven in't Wark stahn un funnen keen Köper. To'n End weer nix mehr to retten un 15000 Lüüd harrn keen Arbeid mehr.

Carl Borgward hett de Pleite man twee Johr överlevt. 1963 is he in sien Villa in Horn sturven, dat Hart harr nich mehr mitmakt. In dat Borgward-Huus, dat he 1953 köfft un umbuut hett, kunn sien Fru noch bit to ehr Dood in't Johr 2000 wohnen.