Wilhelm Kaisen



„Kiek nich in’t Muuslock, kiek in de Sünn.“



Een Bürgermeister, de platt snackt hett un vun een kleene Kaat weg in't Amt keem, dat makt neeschierig. Over een kriggt gau toweeten, dat Wilhelm Kaisen keen Buer vun Huus ut wesen is. He weer för de Nazitiet in Bremen Senator un de Nazis hebben dorför sorgt, dat he sien Amt verloor. So weer dat - vun hüüt ut sehn - nich verwunnerlich, dat de Amerikaner em vun't Feld holten un eerst to'n Senator un denn to'n Bürgermeister makten. He harr de Nazitiet op een lütte Siedlersteed in Borgfeld as Buer aftöövt.

Ok as Bürgermeister is he dor wohnen bleven. In sien Buernhuus leet he sik sogor vun de Bundespräsident Heuss besöken. Man mag meist nich glöven, dat he sien Landwirtschaft noch wieter bedreven hett as he int Radhuus regeert hett. Dor musse he wull fröh to opstahn.

Anners as hüüttodaags de Bürgermeister weer he keen studeerte Mann. As Söhn vun een Arbeider is he 1887 boren wurrn. He gung in Hamborg na de Volksschool un hett toeerst as Fabikarbeider un denn as lehrte Stuckateur arbeidet. He is nebenbi op de Abendschool vun de Arbeiderbildungswark gahn. Sien Partei, de SPD, hett em denn na Berlin op de Parteischool schickt. Dor hett he uk bi Rosa Luxemburg lehrt. So is he Zeitungsmann wurrn un keem 1919 na Bremen to de Bremer Volkszeitung, de to de SPD höre. So een Bildungsgang kann sik hüüt keeneen förstellen.

Na een Johr is he bi de Zeitung all Chef wurrn un keem vun dor in de Bremische Bürgerschaft. 1928 is he Senator wurrn un 1930 weer he in de Bremer SPD ganz vörn. 1933 hebben de Nazis de SPD-Senatoren ut de Senat schmeten un he hett sik de Siedlersteed köfft. Twölf Daag harrn se em insparrt. Dat harr sien Fru mehr tosett as em sülvst.


1945 weer in Bremen allens in Dutt. Dat de Stadt wedder op de Fööt keem, weer dat Wark vun Wilhelm Kaisen; dor weern de Bremer vun övertüücht. Dat de Warft, Schifffohrt un Handel wedder in Gang keemen un dat de Lüüd wedder een Dack över de Kopp kreegen, wurr em toschreven. Bi de Amerikaner hett he dörsett, dat Bremen wedder eegenständig wurr; dat weer de Bremer wichtig. In de Nie Vahr hebben de Lüüt noch lang na sien Tiet to twee Drittel SPD wählt. Hüüt leven door Lüüt, de to twee Drittel nich to Wahl gahn un vun Wilhelm Kaisen nix vun aff weten. Vör föftig Johr, 1965, hett he sien Amt as Bürgermeister afgeven; dor weer he achtunsömptig Johr old un harr Bremen knapp twintig Johr regeert.1979 is he op de Riensberger Friedhoff begraaven wurrn. To sien hunnertfiefundtwintigste Geburtsdaag is an't Herdentor een feine Denkmaal opstellt wurrn.


Wenn du mehr över Wilhelm Kaisen weten wullt, kiek mal op de Siet vun Wikepedia: http://de.wikipedia.org/wiki/Wilhelm_Kaisen

Klick mal op een vun de Biller un kiek die denn de ganze Billerreeg an; dat lohnt sik. Dor findst du ok dat Denkmaal.

Un kiek op de Siet vun de Helene und Wilhelm Kaisen Stiftung :

http://www.wilhelm-kaisen.de/de/stiftung/

Dor gifft dat uk een feine Billergalerie.