Dispatcher


Ik heff seggt, dat ik ingelsch kann un wurr een „Dispatcher“, du kannst ok seggn, ik weer een Telefoneerer, de Natoingelsch snackt. Mit dat Ingelsch gung dat so lang gut as keen „native Speaker“ an de annere Enn weer; denn geev ik de Hörer wieter an de OvD, dat weer een Pilot, de kunn dat beter.

Dat beste weern de Nachtdeenste. De harr ik tosamen mit een Offzeer. Man harr nix to doon, over man musse mitkriegen, wenn Alarm geven wurr. Eenmol hett een Suldot de Alarm verslapen. Siet de Tiet musse de Offzeer neben de Telefon oppassen un wie kunnen achtern slapen.

Na de „anstrengende“ Nachtdeenst harr ik een Dag frie. In de Sommertiet kunn ik mi in de Tog setten un na Westerland fohren. De Fohrt weer verbilligt un ok Kurtaxe bruke man as Suldot nich betaalen. Dat geev een Melkkurhuus, dor heff ik buten op de Terrass Melkries mit Kirschen eeten. Dor dröm ik hüüt noch vun.

Een Nachtddeenst warr ik nich vergeten. Morns hörten wi Narichten: De Warschauerpakt-Staaten weern in Prag inmarscheert. Wi harrn keen Alarm kreegen. Dor wuss ik: De Nato wull dormit nix to doon hem. Man mulmig weer mi doch.

To de Tiet weer in Vietnam noch Krieg. Un ik dacht mi, wenn de Amerikaner Bomben afschmieten, denn sünd dor ok Dispatcher to nödig, de jüst dat doon, wat ik jeden Dag dee. Dor harr ik an to knuusen.

Een Schoolfründ schicke mi ut Bonn een Ansichtskort. He studeere in Berlin un weer so um de Bund rum kaamen. Nu weer he to de grooten Demonstrationen gegen de Notstandsgesetze na Bonn fohrt. Op de Koort harr he all de Snacks opschreven, de op de Plakate stunnen. Dor harrn wi denn ok wat to diskuteern.

 

Överall op de Welt weer 1968 wat los un ik seet in Leck un töve dorop dat ik na Kiel kunn, ik wull studeern.

 

In de Tiet as ik in Leck weer, is keen Fleeger afstürzt. Over ik weer noch nich lang in Kiel, dor stunn in de Zeitung, dat een Hauptmann ut Leck in de Nordsee fullen un doot bleven weer. Ik harr mit em Deenst hat un wusse, he harr een Frau un twee Kinner. Un ik dache dor an, dat een Dispatcher sin Nomen vun de groote Magnettofel afnehmen un in de Schuuflaad steeken muss.

>>>wieter                                                                                                                        <<<torügg