Ut mien Tiet bi de Bund



Ik weer knapp achttein un wull keen Suldot warrn un dacht, dat is keen Problem, de warrn di utmustern, denn ik harr een kaputte Knee. Dat Krützband weer lädeert. Se hem mi over liekers nohmen, bi de Luftwaffe. Se dachten, ik weer een Simulant.


Na de Grundutbildung keem ik na Leck un dor wurr ik erstmol „Wachwilli“. Dor stunnen wi an de Schlagboom un kontrolleerten Utwiese. Eenmal hefft se nakeken, wi wi unse Arbeid maakt hem un sind mit Papieren dörkaamen, de dor, wo dat Bild sien sull, een swarte Plack harrn.


Nachts müsst wi op een Öllaager oppassen. Dat weer een poor Kilometer weg vun de Flugplatz. Dor stunnen Lastwaagen, man wi dröffen uns dor nicht insetten. Na jo, wenn dor een Kontrolle keem, kunnst du se all vun wieten sehen, wenn du nich inslaapen weerst.

Wi leepen mit een Machinenpistool. De harr 20 Patronen, over de eerste weer een Platzpatron, denn se truuten uns nich veel to. In een annere Laager harr eener in Düstern wat höört und prahlt: „Halt wer da?“, as he keen Antwort kreeg, hett he schoten. An de annere Morn leeg een doote Koh för de Tuun.


Eenmol harrn wi een „Sondereinsatz“. Neeg bi de dänische Grenz weer een Hubschrauber notlandet. Över Nacht sulln wi oppassen, dat de nich klaut wurr. Dat weer dat gröttste Schietwedder, dat du di denken kannst. Wie stunnen Wache un sleepen in klamme Slaapsäcke. Klor, dat se wedder seern, dat wi nich rinklarrn sulln.

Gegen Mitternacht seegen wi een Licht, de op uns ganz suutje tokeem. Dat Licht wackele nich un wi wussen lang nich, dat dat een Fohrrad weer. Ok wi prahlten: „Halt wer da?“. „Dat wull ik just ok seggen.“, weer de Antwort. Dat weer eener vun de Toll. He keek sik de Hubschrauber an un fohre wedder torügg. An de anner Morn keem he wedder mit sin Rad an und harr de Manteltaschen vull vun kleene Schnapsbuddeln. De kreegen wi to Fröhstück: „Ska wi skoln?“ He kreeg de Schnaps jümmer vun de Lüüd, de över sin lütte Grenzövergang keemen un mehr Schnaps mit harrn as se dröffen.

Naher kreegen wi toweeten, de Hubschrauber weer heel wen, blots een Instrument harr verkehrt wiest.