Vun dat Mieten vun een Wohnung

 

 

 

As ik jung weer heff ik mol hier wohnt un mal dor. Un wenn ik een nie Wohnung bruke, kreeg ik dat mit wildfremde Lüüt to doon. Dor heff ik dat eene odere annere beleevt. Dat verrückteste is mi in Flensborg passeert.

 

 

Ut Kiel

 

In Kiel heff ik in een Studentenwohnheim wohnt. Na twee Johr musse ik dor uttrecken un mit een Reeg vun Frünnen wulln wi in een Buernhuus in de Neegte vun Preetz an de Postsee trecken. Dat Huus höre een Baptistenpreester, de mit dat Huus veel för hatt harr mit junge Lüüt, de Probleme mit Droogen oder sunst wat harrn. Over dat harr nich klappt, em weer wull dat Geld utgahn. De Köök weer man half fartig un dat ganze Huus een Busteed. De dore Mann is dor schullig an, dat Baptisten bi mi ünnerdörch sünd. He harr uns veel versproken un nix hoolen. Na een Johr weer dat Landlebeven för mi vörbi. Over de Landschap an de Postsee weer een Gedicht mit Huuvendukers op de See un Schlittschohloopen inne Winter.

 

 

Dorna wulln wi mit veer junge Lüüt tosamen in een Wohnung trecken. Dat geev in Kiel to de Tiet ganz wenig Wohngemeenschaften un wi kreegen de Wohnung eerst as wi seern, dat wi heiraten wullen. Dat mussten wi bi een Wohnungs-Geseellschapp ünnerschrieven.

Heizt wurr mit een Zentralheizung. Dor musse in de Köök mit Köhlen inbött warrn. Anfengt wurrn de Köhlen mit een Gasflamm, de ut een isern Rohr keem. De Köhlen mussen wi ut de Keller hochdreegen. De Wohnung kunnen se blots noch an Studenten loswarrn. Dat weer to Anfang vun de söbentiger Johrn.

As ik fief, söss Johr later in Bremen mit mien Fru ohne Truschien een Wohnung mieten deer, weer dat keen Problem mehr.

 

 

Ut Flensborg

 

Ik wull Lehrer warrn un harr een Steed an de Seminar in Flensborg kreegen. Toeerst musse ik een Wohnung finnen. Tohuus kunn ik in't Tageblatt kieken, wat anbödd wurr. In de Norderstraat geev dat glieks twee in een Huus un billig dorto. Mi düchte de weern so billig wegen de Neegte to de Rotlichtveertel; de Oluf-Samson-Gang leeg liek um de Eck. Na, ankieken kannst du de jo mol, dachte ik.

De Ingang ünnen weer een beten schmuddelig un dat geev dor een Speelhalle over de eene vun de beiden Wohnungen weer graad richtig för mi: twee Stuven, den ineenanner övergungen, un een eenfache Köök. De Stuuv harr groote Fenster over seeg düüster ut , allens weer bruun, dat mehrste dunkelbruun, blots an de Ecken een beten heller. Dor musst du di an gewöhnen oder dat övermaalen. Denn geev dat noch een poor feine Mahagonimöbel, dor weer een groote Schrievdisch bi, de ik goot bruken kunn.

Over nu keem de Katt ut de Sack: In beide Wohnungen harrn Mannslüüd wohnt. De eene weer doot, de annere inne Knast. De eene harr de annere doothaut. Du kannst mol raden, ob ik de Wohnung nohmen heff.

 

 

Ut Husum

 

Mien eerste Lehrersteed kreeg ik in Husum. Wedder muss een Wohnung her. Ik harr een Angebot in Schobüll. Dor geev dat een Apartment mit een groote Fenster na Westen. Vun boven kiekst du dor över dat Water na Nordstrand. Dat is de eenzige Steed in Sleswig-Holsteen, wo de Geest bit an de Nordsee reckt.

Dat weer een Eegentumswohnung, de een Koopmann ut Eiderstedt höre. He seer, dat sien Kunden in't Dörp nich toweten kriegen durven, dat he so veel Geld verdeene, dat he sik dor een Wohnung vun koopen kunn. Man dat weer för sien Rente un he meene dat weer de Lüüd in't Dörp egal, vun ehr Geld sull keener riek warrn. Dor müss he as Koopmann an denken.

 

 

Ut Bremen

 

Wi harrn een Wohnung in Bremen, de to kleen wurr as dat tweete Kind keem. Een Wohnung , de groot noog  weer, de weer swor to finnen. Eenmol stunnen wi mit achtig annern op een List, over de Wohnung kreeg een vun den annern negenunsömptig. Denn kreegen wi toweten, dat een Familie ut een lütte Huus uttrecken wull und kreegen de Adress vun de Vermieter, een ehemolige Veehdokter, in Borgfeld. De wohne in een groote Huus tosamen mit sien Dochter un Swiegersöhn. De vertellten uns, dat Vadder allens mit sien eegen Hannen verdeent harr: de Villa in Borgfeld un twee Hüüser in Bremen. Ik stellte mi för, dat he sien Hannen dor wiet to in de Mors vun de Köh schuven musste. Later heff ik hört, dat he to de richtige Tiet Wümmeland köfft un denn as Buland wieter verköfft harr. To de Ünnerschriften bruukst du ok dien Hannen.

 

 

 

 

 

>>>wieter