Wo Sass korrekt is, over ik dat nich weer


 


Dat gifft op Platt keen Woort für „erziehen“ oder „Erziehung“. In Plattland kannst du din Kind blots optrecken oder groottrecken un de Grootöllern könnt dat Gör villicht noch vertrecken.


Over man musse doch leern, wat richtig un wat falsch is. Bi mi gung dat in de Regel ohne Prügel af, bit op een mol.

Dat geev een Familie in't Dörp, de harrn veertein Kinner. Wenn man op de Weg na de Koopmann dor lang sull, denn weer man Kropper Busch lang noch nich vörbi. Ik mag dree oder veer Johr old wen sin, as ik mi för unse Husdör stark föhle - Mudder weer inne Neegte . „Zigeunerkinner! Zigeunerkinner!“, reep ik twee vun de kleenen Kinners na. „Ik will di wat bi Zigeunerkinner“, prahle Mudder un ik kreeg stantepeede wat an de Riestüten. Dat hett op de beiden Kinner - un denn wull op de ganze Familie - so'n Indruck makt, dat ik dor na immer ohne Angst bi se vörbi gahn kunn. Un ik harr ok wat lehrt: Wat ik dor anstellt harr, weer schlimmer as allens wat ik bit dorhen verkehrt makt harr.


Ik heff mi manchmal froogt, wat Mudder doon harr, wenn dat wirklich Sinti oder Roma wesen weern. Wat se vun de wusse, dat harr se in de Nazitiet un villicht ok dorvör lehrt. Wenn se meene, dor weern Zigeuner in't Dörp, denn nehm se de Wäsche aff un stelle een Bessen quer för de Stalldör.


„Zigeuner“ kümmt in dat Wöörbook vun Sass nich vör, over „Sinti un Roma“, un dat is korrekt.