Dat Care-Paket ut Jowa

 

 

Na de Krieg keem

nich blots een

Paket ut Amerika

vun Tante Anna ut Jowa

mit Kakao un Kaffe

un Corned Beef,

afleggte Tüch un ni'e Stoffe.

 

För Mudder weer 

dat Beste de Kaffe

un ik harr gau

de Kaffemöhl 

twischen de Kneen

un durf dreih'n

un wi dat rüke,

dat weer'n Gedicht.

Denn hett se'n Tass drunken

oder twee

un ik kreeg Kakao.

Se pucke vun Maxwell un Amerika.

Op dat Corned Beef 

kunn se verzichten.

 

De Hemden weern „Hawai“

un de Büxen passten

vörn un achten nich

un harrn Nieten.

Denn keem Fru Klein:

se sull wat ännern

oder wat Ni'es neihn.

 

Ut deselve bunte Stoff

neihte se feine Kleeder

för Mudder un Döchter.

Denn wurr een Foto maakt

un dat Bild schickt

as Dank an Tante Anna,

mit een "Moin" na De Moin' in Jowa.

 

Erst „very late“

heff ik lehrt,

wat dat heet:

Care-Paket.

 

Un dat heet nich Jowa,

dat heet Eiowa,

seer de Enkel to de Oma.